A cita cultural contará este ano cunha pantalla exterior para poder seguir as actuacións e unha carpa para dar cumprimento ás medidas Covid

 

Sanxenxo, 14 de outubro de 2021.- O III Concurso de Música Tradicional Soalleira chega este domingo ao Pazo de Emilia Pardo Bazán plenamente consolidado no calendario cultural autonómico con 32 grupos procedentes das provincias de Pontevedra, A Coruña e Lugo. A cita terá lugar este domingo 17, en horario de mañá e de tarde, ás 11 e ás 16 horas, nos que se repartirán as catro categorías participantes.

 

O concurso, organizado pola Asociación Cultural Soalleira de Dorrón e o Concello de Sanxenxo, inclúese dentro do programa Sanxenxo Fala, e contará este ano cunha pantalla no exterior dende onde se poderán seguir as actuacións, se o aforo do salón de actos está completo, e tamén cunha carpa onde poderán esperar os grupos participantes. A inversión municipal neste evento supera os 7.000 euros, nos que se inclúe loxística, difusión e adecuación do espazo. 

 

As categorías A (ata 10 anos), B (de 11 a 13 anos) e C ( de 14 a 17 anos) competirán durante a mañá e a D (de 18 anos en diante). Repartíranse un total de 3.500 euros en premios e o xurado terá en conta a autenticidade, dificultade, afinación e interpretación. Así mesmo haberá tamén 2 premios para mellor vestiario.

 

A pandemia obrigou a suspender o ano pasado o concurso e este ano, a pospoñelo a outubro, pero pese a que moitos grupos comezan a retomar as súas actividades agora, o respaldo á cita quedou plenamente demostrado coa inscrición de 32 grupos que chegarán de distintos puntos de Galicia. A idea é que o próximo ano se volva a data marcada inicialmente no mes de maio. 

 

Dende a Concellería de Cultura, Paz Lago, destaca a calidade da cita e a importancia dun evento cultural que enriquece a programación cunha aposta clara pola tradición e o folclore popular.