O pasado venres rematou o taller de robótica “Nadal robótico”. Durante tres días os rapaces e rapazas traballaron con robots Makeblock Ranger. Así pois, programaron unha tarxeta de felicitación de Nadal interactiva, probaron os diferentes sensores do Ranger e programaron un repartidor de regalos para axudar a Papa Noel nestas datas.
Este taller foi levado a cabo por SalnésCampus, laboratorio tecnolóxico aberto formado por mestres, enxeñeiros e outros profesionais.
A próxima semana será a quenda dos mais pequenos. Os días 2, 3 e 4 cun horario de 10:30 a 13:30, 12 cativos de entre 1º e 6º de primaria poderán aprender cos robots Makeblock mBot.
Terán o complexo obxectivo de publicar unha felicitación animada de Nadal e programar un belén robótico, onde deberán de levar a cabo unha competición de velocidade entre os camelos robóticos dos Reis Magos, asegurarse que a Estrela chegue ó portal de Belén e programar os pastores robóticos para que canten panxoliñas.
