— O secretario xeral da Emigración, Antonio Rodríguez Miranda, e o alcalde de Sanxenxo, visitaron hoxe o obradoiro dun artista deste concello que traballou no Capitolio de USA, no Cemiterio de Arlintong e no Museo Botánico de Nova York 

— A liña de Axudas ao Retorno Emprendedor, que este ano chega ata os 10.000 euros, continúa aberta ata o 30 de setembro 

— En 2021 beneficiáronse destas axudas un total de 19 empresas na área da Delegación da Xunta en Pontevedra, o 90% das mesmas situadas nun concello do rural 

O secretario xeral da Emigración, Antonio Rodríguez Miranda, e o alcalde de Sanxenxo, Telmo Martín, coñeceron hoxe o proxecto empresarial dun veciño deste concello retornado de Estados Unidos que puxo en marcha un obradoiro no lugar de Vinquiño, contando coas axudas deste departamento autonómico, e dende onde crea obras escultóricas que destina, entre outros clientes, a edificios públicos do país americano. 

Francisco Castro Freijo contou cunha axuda de 7.000 euros da Secretaría Xeral da Emigración a través do programa de Axudas ao Retornado Emprendedor co obxectivo de retomar o obradoiro do seu pai, onde deseña e executa as súas esculturas, aplicando a súa formación na Escola de Canteiros de Poio e a súa experiencia durante os anos que traballou en Estados Unidos, levando a cabo a restauración do Capitolio e participando en varios proxectos escultóricos para o Cemiterio Nacional de Arlington o para o Museo Botánico de Nova York. 

Francisco Castro retornou de Estados Unidos en 2020, e solicitou a liña de Axudas ao Retorno Emprendedor da Secretaría Xeral da Emigración. Precisamente, o secretario xeral da Emigración aproveitou a visita para recordar que esta liña de axudas continua aberta ata finais de setembro, cun orzamento que en 2022 rolda o millón de euros. “De feito, este ano aumentamos a dotación da mesma, e os interesados poden chegar a recibir ata 10.000 euros, co obxectivo de colaborar coas persoas emigrantes galegas retornadas para que poidan exercer a súa actividade laboral ou profesional na nosa comunidade autónoma, promovendo o autoemprego”. 

O secretario xeral destacou a labor deste artista “que tras adquirir unha gran experiencia no ámbito no que está a desenvolver a súa labor, optou por poñer en marcha aquí a súa propia empresa que mantén o contacto con Estados Unidos, executando nestes intres varios capiteis que teñen como destino o Capitolio”. 

As axudas para o Retorno Emprendedor aumentaron este ano, partindo dos 6.000 euros (aumentables en 1.000 se a beneficiaria é muller e outros 3.000 se se pon en marcha nun concello rural), pudendo chegar así ata un total de 10.000 euros. 

En 2021 a área da Delegación da Xunta en Pontevedra contou con 19 beneficiados por estas axudas, case o 90% deles en concellos do rural, destacando os catro que se aprobaron para O Grove, os dous do Rosal e outros dous en Poio. O resto foron para beneficiarios de concellos como Mondariz, Rodeiro, Silleda, Vila de Cruces ou Tomiño. 

Desde a posta en marcha deste programa, foron case 600 os galegos retornados que xa crearon un proxecto empresarial apoiado a través da Secretaría Xeral da Emigración. “A Xunta inverteu algo máis de 4M€, pero o impacto económico para Galicia foi máis de 32M€, así, por cada euro que a axuda dá para poñer en marcha un negocio, os beneficiarios multiplican por oito a inversión”, comentou Miranda 

Esta liña de subvencións ten como fin favorecer o retorno á nosa comunidade autónoma dos galegos residentes no exterior de xeito que poidan fixar a súa residencia e integrarse social e laboralmente na sociedade, realizando nela as súas actividades empresariais e profesionais, favorecendo así o desenvolvemento do tecido empresarial de Galicia. 

Trátase dunha das máis de 60 medidas activas da Estratexia Galicia Retorna, de carácter transversal e coordinada pola Secretaría Xeral da Emigración coa colaboración de todos os departamentos da Xunta de Galicia. 

Gabinete de Comunicación da Secretaría Xeral da Emigración