Os escolares do colexio de Portonovo retomaron esta mesma semana as clases de Educación Física no interior do pavillón, unha vez concluída a renovación da cuberta e dunha profunda limpeza das instalacións. As obras financiadas pola Consellería de Educación e que roldan o millón de euros están a piques de culminar á espera de pequenas melloras, incluídas no remate da actuación.

 

O alcalde, Telmo Martín, acompañado das concelleiras de Planificación Territorial, María Deza, e de Educación, Paz Lago, o director do centro, José Currás, e o encargado da empresa adxudicataria supervisaron os traballos realizados. Durante varias semanas e por motivos de seguridade, tanto a contorna do ximnasio como o do patio cuberto permaneceron valados. Nos próximos días, comezarase a retirada do material de obra do patio mentres se acometen melloras de acondicionamento exterior e nos accesos.

 

A obra, que está previsto que logre unha redución en consumo enerxético do 30 % no gasto corrente, inclúe a substitución de todas as cubertas dos diferentes edificios que compoñen o centro por unhas novas de panel tipo sándwich, a renovación de canlóns e baixantes correspondentes. 

Para mellorar a sensación térmica, renovouse case a totalidade da carpintaría exterior do centro educativo, colocando unha nova con rotura de ponte térmica e vidro dobre baixo emisivo, incluídas as persianas e as súas caixas; e cambiáronse as luminarias existentes, por un tipo LED, con equipos de regulación e detección do movemento.

A actuación incluíu o pulido do chan de terrazo, o pintado dos paramentos e a colocación de falso teito de la de roca con panel acústico no edificio de Infantil, despachos, almacéns e pavillón, entre outras zonas que carecían del ata agora.