A Policía Local desprazouse ao areal e elaborou un informe que xa se remitiu a Costas para solicitar a súa reparación

O Concello de Sanxenxo a través do seu departamento de Medio Ambiente notificou a Costas esta mesma mañá o desprendemento de varias pedras e terra de parte do muro de contención da praia de Fontenla. A Policía Local desprazouse ata o punto no momento que se tivo coñecemento do dano para elaborar un informe que xa foi remitido ao servizo provincial para solicitar a súa reparación con moita brevidade.

Probablemente os diversos fenómenos meteorolóxicos costeiros, como os fortes ventos e a ondada, puidesen influír no derrube de parte do muro que se atopa ao fondo da praia e sostén o camiño de acceso ao areal.
Mentres non se repare, a zona quedará sinalizada para evitar riscos e que ninguén poida acceder á área de desprendemento.

O pequeno areal de apenas 100 metros sitúase en Noalla e está incluída no convenio Ramsar, Rede Natura 2000 e está considerada un Lugar de Importancia Comunitaria (LIC), así como unha Zona de Especial Protección para as Aves.