O servizo de socorrismo contabilizou un total de 816 intervencións durante o mes de xuño en oito areais. O Concello adiantou a vixilancia en praias este ano desde a primeira fin de semana de xuño en Areas, Silgar, Canelas e Montalvo, e todos os días desde o 15 de xuño, data na que se sumaron as praias de Area de Agra, Foxos e Ou Espiñeiro-A Lanzada. O servizo está xa funcionando con normalidade nos 17 areais con bandeira azul desde o 1 de xullo. O areal no que se rexistraron maior número de incidencias foi Montalvo con 243 seguida de Silgar (168), Canelas (166) e Areas (129). Os incumprimentos de distinto tipo da ordenanza de praias obrigaron a actuar aos socorristas ata en 278 ocasións: presenza de animais, depósito de residuos, incumprimentos na zona de baño…

Cabe lembrar que a presenza de animais está prohibida nas praias durante a tempada de baño que comeza o 15 de xuño ata o 15 de setembro, adiantándose en praias de especial protección ao 15 de marzo. Un total de 127 persoas foron atendidas por picaduras de faneca, 7 por unha escordadura, 4 por contusións e 67 por feridas de distinta gravidade. Tamén 6 bañistas foron atendidos por picaduras de insectos e oito por problemas en oídos e ollos. A calor e o cambio brusco de temperaturas provocaron que se tivese que tomar a tensión a 5 persoas. Afortunadamente, ningunha das intervencións rexistradas durante o mes de xuño resultou de gravidade. A instalación do balizamento en Semana Santa tamén facilitou o traballo dos socorristas xa que quedou perfectamente delimitada a zona de baño e a zona para actividades acuáticas.