Trátase dunha iniciativa que combina formación, integración, autonomía persoal e novas oportunidades para persoas adultas

Sanxenxo, 24 de setembro de 2026.- O Concello de Sanxenxo dará continuidade o vindeiro curso ao programa municipal Ensinanzas Abertas, unha iniciativa consolidada ao longo dos anos como unha importante ferramenta de formación, inclusión e promoción social para persoas adultas que necesitan retomar os seus estudos, mellorar as súas competencias básicas ou avanzar na aprendizaxe do español.

O programa enmárcase no compromiso que o Concello mantén desde 1996 coa educación de persoas adultas e coa prevención de situacións de exclusión, abandono formativo e dificultade de acceso ao mercado laboral. A experiencia acumulada confirma a necesidade de manter unha oferta flexible e adaptada ás circunstancias persoais, familiares e laborais da cidadanía.

Durante o curso 2025/2026, Ensinanzas Abertas estruturouse arredor de cinco propostas complementarias: Español como Segunda Lingua, Educación Básica para Persoas Adultas, Formación para a obtención do título de ESO, Lectoescritura en español para persoas adultas estranxeiras e Obradoiro de Lectura.

Os resultados recollidos na memoria do programa son moi satisfactorios. O alumnado non só ampliou coñecementos e adquiriu novas competencias, senón que tamén experimentou avances en autonomía, autoestima, participación, relacións sociais e integración. A asistencia e a implicación foron regulares, e a maior parte das persoas participantes manifestaron a súa satisfacción e o seu interese por continuar o vindeiro curso.

Un dos ámbitos especialmente significativos foi o de Español como Segunda Lingua, no que participaron 21 persoas entre outubro e marzo. Parte do alumnado chegou derivado desde ACCEM e desde os Servizos Sociais municipais, o que evidencia a estreita relación entre o programa educativo e o traballo de acompañamento e inclusión social.

Ensinanzas Abertas permite, ademais, establecer itinerarios progresivos. Algunhas persoas comezan pola aprendizaxe do idioma ou polo reforzo das competencias básicas e, posteriormente, continúan a súa formación para obter a ESO, mellorando así as súas posibilidades de acceso á formación e ao emprego.

Desde o Concello destácase que o valor do programa vai máis alá dos resultados académicos. Ensinanzas Abertas ofrece un espazo de oportunidade para persoas que, por diferentes circunstancias, quedaron fóra do sistema educativo ou necesitan recuperar competencias, seguridade e autonomía para avanzar no seu proxecto persoal e profesional.

A continuidade da iniciativa o vindeiro curso responde, polo tanto, á demanda existente e aos resultados acadados, reafirmando a aposta municipal por unha educación accesible, flexible e vinculada á inclusión, á prevención e á igualdade de oportunidades.