Logo das xornadas de formación realizadas o ano pasado no IES Vilalonga, este ano tomouse a decisión de trasladalas tamén aos demais centros que imparten Ensinanza Secundaria Obrigatoria no concello, o IES Sanxenxo e o Colexio Abrente.
Estas xornadas estiveron dirixidas ao alumando de 1º da ESO e, no caso do IES Vilalonga, tamén 1º de Bacharelato e os 1º cursos dos Ciclos Formativos. O obxectivo das mesmas e conseguir que o alumnado dispoña dunhas nocións básicas para recoñecer unha parada cardiorrespiratoria, para poder alertar aos servicios de emerxencias e iniciar as manobras de reanimación cardiopulmonar (RCP).
Poñer en posición lateral a unha persoa con dificultades respiratorias ou practicar unha reanimación cardiopulmonar, foron algunhas das cousas que o alumnado dos tres centros educativos puido aprender ao longo desta semana.
Para o desenvolvemento desta actividade foi imprescindible a colaboración dos médicos, enfermeiros e técnicos de SEMES Galicia, coa colaboración da Fundación Pública Urxencias Sanitarias de Galicia 061 e a Asociación Galega de Técnicos en Emerxencias Sanitarias (ASGATE).
Centros e concello están enormemente agradecidos pola dispoñibilidade e participación prestadas por estes profesionais. E ademais o goberno quere mostrar o seu agradecemento o Obradoiro de Hostelería do Salnés e ao Hotel Galatea pola colaboración prestada para o aloxamento e comidas do persoal participante nas xornadas.
A morte súbita debida a un paro cardíaco é unha das primeiras causas de morte a nivel mundial. A execución da RCP por parte das testemuñas do momento é determinante para a supervivencia á hora de asistir a un paro. Por consecuencia considérase indispensable educar á poboación neste tipo de técnicas e empregar aos centros escolares como medio de propagación das mesmas.