O goberno está satisfeito porque as 14 fogueiras autorizadas nas praias urbanas se desenvolveron con normalidade e as miles de persoas que participaron nelas comportáronse con moita responsabilidade.
O goberno quere agradecer publicamente a colaboración das persoas que participaron nas fogueiras de San Xoán convertendo a noite nunha auténtica festa popular. Neste sentido, hai destacar a colaboración de colectivos como SOS Panadeira, que contribuíron ao bo funcionamento das fogueiras en praias tan populares como Caneliñas, Silgar e Panadeira.
Ademais, hai que destacar que se respectara a prohibición de facer fogueiras nas praias con dunas, especialmente Montalvo, cuxos accesos foron cercados ás 22:30 horas. e tiña unha vixilancia especial ao longo da noite pola policía local e pola garda civil, para evitar que se organizaran, como en anos anteriores, celebracións fóra de control cos riscos que isto supoñía para o ecosistema da praia.
O goberno tamén quere felicitar a todos os empregados municipais que traballaron intensamente para que o operativo previsto dera o resultado óptimo. A policía local, o servizo municipal de emerxencias, o persoal de limpeza das praias e o persoal da Concellería de Medio Ambiente, que coordinou todos os preparativos. En nome do goberno, moitas grazas a todos.
Este ano deuse un paso acertado, apostando por fomentar as fogueiras nas praias urbanas e prohibilas nas que teñen ecosistemas delicados e, polo tanto, que requiren da máxima protección. Este é o camiño que hai que seguir e xa anunciamos que, se o próximo ano seguimos gobernando, a nosa intención é promover as fogueiras de San Xoán nas praias urbanas, especialmente en Silgar, que é a máis grande. Por suposto, ampliar e mellorar tamén o funcionamento da seguridade e limpeza, se é necesario.