Na parroquia de Noalla, o vial que transcorre desde Cruceiro Monte Faro a Pontes, atópase moi deteriorado. É por iso que para dotalo dun asfaltado que mellore a circulación do tránsito que soporta, redactouse un proxecto coas principais necesidades do mesmo.

Na actualidade o vial ten grava e restos asfálticos e a actuación consistirá en dotar aos 725 m de lonxitude dunha mestura bituminosa en quente.

As obras comezarán coa limpeza completa do vial, varrido da superficie, regularización da mesma coa mestura e a dotación da capa de rodaxe en quente. Para terminar, instalarase a sinalización horizontal necesaria.

Para poder levar a cabo esta actuación, foi preciso solicitar unha serie de autorizacións sectoriais:

• Axencia galega de infraestruturas, pola afectación da vía rápida autonómica VRG-4.1

• Deputación Provincial, pola afectación da estrada provincial EP-9208.

• Augas de Galicia, pola zona de canles de rego de Besadoiros.

• Consellería de Cultura, educación e ordenación universitaria, pola afectación do Túmulo IV de Monte Faro.

• Consellería de Medio Ambiente e ordenación do territorio, por estar o lugar afectado por unha zona denominada polo POL como de Ordenación.

A obra, que comezará nas próximas semanas, ten un prazo de execución dun mes e foi adxudicada por un importe que ascende a 27.500€, que serán financiados a través do Plan de Mellora de Camiños Municipais 2017/2018 da Axencia Galega de Desenvolvemento Rural (AGADER).