O Concello finalmente dispón de 1.917.093€ para afrontar a rehabilitación do Pazo de Quintáns. 1.376.465€ proceden da axuda concedida polo Ministerio de Fomento. Inicialmente a axuda era de 903.923 €, pero viuse incrementada, primeiro con 419.112€ e máis recentemente cunha nova achega de 53.430 €.
O Concello pola súa banda achegará 540.628 € que proceden das partidas dos dous últimos presupostos, 2017 e 2018. A intención do goberno é licitar, e se se pode adxudicar, o proxecto de rehabilitación do pazo de Quintáns no mes de outubro.
O Pazo de Quintáns, é unha construción singular cuns espectaculares miradoiros sobre a horta e sobre a enseada da Lanzada e Ou Bao. Consérvanse neste conxunto, o pazo, a capela, as construcións auxiliares e o hórreo; ademais dos espazos verdes: patrios, praza frontal, xardín e horta murada, todos eles cunha configuración adquirida desde finais do século XVI, como unha posible evolución da torre do Casal de Moldes.
O estado actual de conservación do edificio principal é malo polo abandono sufrido de forma prolongada, que derivou nun proceso grave de deterioración material da cuberta e forxados do mesmo. Con todo, o muro de mampostería que rodea toda a leira, de máis de 9.000m2, está moi ben conservado. En canto ao inmenso xardín hai que cualificalo dun auténtico tesouro botánico que requirirá moi pouca intervención para que poida recuperar todo o seu esplendor. A intención do goberno é que este xardín convértase nun parque público que poidan gozar a diario os veciños de Noalla.
A filosofía principal do proxecto de rehabilitación que foi realizado por Mario Crecente e Asociados Consultores é manter as estruturas orixinais do Pazo, sen derrubar fachadas, nin cubertas. En definitiva, non se fará ningún cambio que modifique a estrutura orixinal do edificio.
O equipo técnico que redactou o proxecto está formado por licenciados en historia, arqueoloxía e enxeñeiros que acrediten experiencia en traballos con bens declarados de interese cultural. A intención do proxecto é habilitar no Pazo, o Museo da Paisaxe Cultural da Lanzada, como unha Sala do Museo de Pontevedra que presente o conxunto patrimonial da antiga xurisdición, a partir dos achados do sitio arqueolóxico da Lanzada.
