Desde a Concellería de Medio Ambiente encargouse un proxecto, valorado en 48.300 € para continuar coa mellora das instalacións do parque de Punta Vicaño.
O goberno local comezou o ano pasado coa mellora ambiental dos 22.000 m2 que mide o parque.
Este novo proxecto busca a conservación, a reposición e a restauración do ambiente e o reequilibrio do Parque Vicaño, que actúa como un pulmón verde para os núcleos de Sanxenxo e Portonovo.
Ata o momento fíxose no parque un replantado de especies arbóreas e agora, farase unha restauración dun carreiro e a incorporación dun estanque con especies vexetais acuáticas.
No carreiro regularizarase o firme e instalaranse traveseiros de pedra rústica para evitar a súa descomposición, conténdoo transversalmente e resolvendo o problema de evacuación de augas con outros traveseiros instalados de maneira oblicua.
A segunda actuación a levar a cabo é a colocación dun estanque, na zona intermedia do parque. A auga partirá dun pozo xa existente, poñéndoo así en valor, e seguirá o seu curso aproveitando a pendente xerada cuns chanzos ata chegar ao estaque, que terá unha superficie de 80 m2.
O estaque terá diferentes profundidades e unha rica variedade de especies vexetais acuáticas. E a presenza de auga mellorará o ecosistema existente, sendo un elemento de atracción para certas especies animais que poderán enriquecer e diversificar a contorna.
REXENERACIÓN DO PARQUE
No ano 2018 levouse a cabo unha tala de parte do arboledo existente, principalmente piñeiros, que creceran demasiado xuntos, estaban enfermos e tiñan unha altura que presentaba un perigo para os usuarios do parque.
Tal e como se comprometeu o goberno despois de tallar os piñeiros levou a cabo a plantación de máis de 80 novas árbores de especies moi variadas.
Zona con arboledo de especies máis propias de xardinería e de gran beleza que fixeron do parque un lugar colorido no outono, como son liquidámbar, ginkgo e faias.
Zona de bosque atlántico con carballos, castiñeiros e acivros, e tamén especies máis mediterráneas como aciñeiras e sobreiras.