Mellorar a seguridade viaria e reordenar o tráfico son os dous obxectivos que o goberno local marcouse coa actuación de pintado que levará a cabo esta semana na Avenida dos Loureiros en Portonovo. O viario, moi transitado polo elevado número de vivendas e por ser un dos accesos á praia de Canelas, contará tras os traballos cunha senda de 1,80 metros de ancho nos tramos onde sexa posible para garantir a seguridade dos peóns. Ademais, a senda delimitarase cunha liña vermella e pictogramas ao longo de todo o percorrido no que se habilitarán catro pasos de peóns. A actuación tamén prevé o pintado de varias prazas de estacionamento nos tramos onde a avenida permíteo e reordenar o espazo dos vehículos e peóns. A velocidade en todo o viario limitarase a 20 quilómetros por hora.

Os traballos na Avenida dos Loureiros seguirán a mesma filosofía e mesmo a mesma estética que a actuación realizada no viario de acceso a Fontoira desde a rotonda á vía rápida cunha senda peonil de case 500 metros. Neste viario acordouse a eliminación de dobre sentido polo perigo que iso supuña tanto para o tránsito peonil como para os vehículos e a aplicación de sentido ascendente para ofrecer unha alternativa de saída do municipio aos vehículos sen que teñan que acceder ao centro urbano. A senda está delimitada con cor vermella e pictogramas de peóns. Neste viario a velocidade limitarase a 30 quilómetros por hora.

O goberno local aplicará este tipo de senda con pictogramas e liña vermella na contorna do colexio da Florida. A contorna máis próxima ao centro educativo contará con velocidade limitada a 20 quilómetros por hora e no resto aplicarase a zona 30. O pintado nesta zona respectará o cebreado en branco que xa está a delimitar a zona peonil, pero reforzarase coa liña vermella e os pictogramas. Outra actuación de pintado afectará o aparcadoiro da Lanzada, un traballo moi demandado, que se efectuará a próxima semana, e co que quedarán delimitadas máis de 300 prazas de estacionamento.