ULTIMAN A INSTALACIÓN DE DÚAS ILLAS DE COLECTORES SOTERRADOS EN RAFAEL PICOU E A ESTRADA DA LANZADA

 

En total serán doce colectores co catro fraccións nos que se investiron case 18.000 euros

O Concello ultima a colocación de dúas illas de colectores soterrados en Rafael Picó e a estrada da Lanzada. En total instalaranse dez recolectores, cinco en cada área, para o depósito de vidro, cartón, plástico e RSU. Os novos colectores nos que se investirán case 18.000 euros terán un dispositivo mecánico que reducirá os custos de mantemento e mellorará o seu rendemento.

 

A instalación das dúas illas concluirá a próxima semana e enmárcase dentro da modernización dos puntos de recollida de residuos levadas a cabo ao longo deste ano en Portonovo e Sanxenxo. Un proceso que se acelerou polo Covid 19 xa que a limpeza e a hixiene adquiriron unha maior importancia. Estes colectores reducen os malos cheiros e facilitan a limpeza do espazo no que se sitúan. Neste caso, os colectores visualmente terán forma de caixa de correos exterior e reducirán o espazo de ocupación na vía pública.

 

Doutra banda, o Concello advirte que incrementará o control e endurecerá as sancións a todos aqueles que deixen as bolsas de lixo fóra dos colectores. Tamén prestará especial atención aos abandonos de voluminosos na vía pública e pide a colaboración veciñal para axudar a identificar aos infractores. As sancións polo depósito deste tipo de aveños ou bolsas de lixo na rúa levan unha multa mínima de 600 euros, un importe que se pode incrementar se o infractor é recorrente. 

 

O goberno local lembra que o municipio dispón dun Punto Limpo en Padriñán e dun servizo de recollida de voluminosos con atención de luns a venres, de 9.00 a 14.00 horas, no teléfono 638 240 885. Ambos os servizos son gratuítos. Con eles trátase de evitar os abandonos na vía pública cos consecuentes problemas de salubridade e de mala imaxe.