O vello quiosco da Praza Pública de Vilalonga ten os días contados. A empresa encargada da súa demolición iniciou esta mesma semana os traballos previos para proceder o seu derribo. A presenza de uralita con amianto no tellado obriga a realizar parte do derribo de forma manual e á colocación dun valado perimetral. Unha empresa especializada no tratamento deste material desprazarase a Vilalonga este venres para retirar parte da cuberta e trasladar o residuo a unha planta de reciclaxe. A principios da próxima semana, comezarase a demolición da estrutura e a retirada do cascallo.

 

Mentres se ultima a saída do quiosco da fachada frontal da Praza Pública, o goberno avanza no proxecto de humanización da contorna que axudará a revitalizar o centro da parroquia de Vilalonga. A arquitecta Irene Campo é a encargada da redacción da reforma que permitirá aproveitar os 4.388 metros cadrados de superficie e recuperar o espazo de convivencia e goce veciñal orixinario da praza.

 

A idea do goberno é potenciar a zona de xogo infantil que se atopa nestes momentos nunha das esquinas da praza e reservar unha superficie de aproximadamente 3.000 metros cadrados como espazo multifuncional e polivalente. Ademais, quere reforzar o arboledo da alameda con máis especies que permitirán dotar a praza de máis e mellores zonas de sombra.

 

A remodelación chegará despois dun longo proceso xa que a praza cambiou a titularidade pública en novembro de 2019 tras un acordo amigable entre o alcalde, Telmo Martín, coa familia Campo para a presentación dunha demanda sobre a propiedade da praza que seguía rexistrada a nome da familia. O Concello fixo ademais efectiva en marzo do ano pasado a compra do quiosco tras abonar ao propietario 39.703 euros, tasación realizada polo arquitecto municipal polos 75 metros cadrados do inmoble.