A actuación valorada en 17.000 euros permitirá ensanchar o viario tras a cesión da parcela que linda co camiño

 

 

 

Mellorar a seguridade viaria nunha das saídas da praia de Canelas. Ese é o obxectivo da actuación que o Concello de Sanxenxo está a levar a cabo nun dos accesos do areal. A obra consiste nun ensanche do camiño municipal, grazas a unha cesión do propietario da parcela lindeira, e no posterior asfaltado. A obra, que ten un custo de 17.000 euros, prevese que conclúa a próxima semana e duplicará o ancho actual do camiño.

 

Con esta actuación continúase coa planificación do goberno local para a mellora de seguridade viaria nos accesos aos areais que habitualmente no verán congregan a un gran número de vehículos e peóns. Na praia de Canelas, no outro punto de acceso xa se habilitou o pasado verán unha senda peonil para garantir o paso seguro das persoas ao areal.