A nova instalación ten un custo de 12.353 euros e substituirá á anterior que tiña unha antigüidade de 17 anos

 

A piscina municipal contará a partir do mes de setembro cunha nova sauna máis ampla e moderna que substituirá á anterior que tiña unha antigüidade de 17 anos. A nova instalación terá capacidade para 8 persoas e a cabina será de madeira de abeto. A fachada frontal será toda acristalada e contará con dous niveis de bancos con luces led. O investimento nesta instalación será de 12.353 euros.

 

A mellora deste servizo súmase ás actuacións xa realizadas nas instalacións municipais ao longo deste ano e que se puideron xa estrear coa súa reapertura o pasado mes de maio. Así se renovou a maquinaria do ximnasio que permitiu habilitar dúas zonas novas, unha funcional e outra de abdominais e estiramentos. Nos vestiarios, colocáronse novos armarios e instaláronse biombos nas duchas. 

 

Na piscina renovouse o sistema de impulsión de aire e colocáronse dúas novas duchas na piscina pequena. En todos os espazos realizouse un pintado xeral, un rexuntado de plaquetas e un cambio no sistema da iluminación a luces tipo LED, así como a limpeza de todos os condutos de ventilación e renovación de imaxe nas diferentes zonas.

 

En todo caso, a posta en marcha da nova sauna dependerá das restricións sanitarias que marquen as autoridades polo Covid, unha vez estea xa instalada.