As actividades impártense no campo de fútbol ou no pavillón de Baltar, dependendo da meteoroloxía
Un total de 116 maiores inscribíronse no programa de actividades física, deportiva e de saúde de Sanxenxo que mantén aínda o prazo de inscrición aberto. A actividade gratuíta para os veciños e veciñas do municipio leva realizándose de forma ininterrompida desde 1999 cun importante éxito de participación.
Os maiores divídense en 3 grupos no que se inclúen participantes das sete parroquias do municipio en clases dunha hora de duración, os luns e xoves e os martes e venres, de 10 a 11 e de 11 a 12 horas. O obxectivo é mellorar as condicións físicas dos participantes cada día de adestramento sen esquecer os importantes beneficios da actividade para o seu estado psíquico.
O concelleiro de Deportes, Daniel Arosa, recalca que os "beneficios para os participantes son moitos, tanto a nivel físico como psíquico, xa que practicando exercizo melloran tamén o seu estado de ánimo e aumenta a súa socialización".
Durante os adestramentos, que se adaptan ao estado físico de cada participante, trabállase a forza, a resistencia, a flexibilidade, a coordinación e a concentración. As sesións realízanse no campo de fútbol e o pavillón de Baltar, en función da meteoroloxía.
Taller memoria
Outra das actividades dirixidas aos maiores do municipio é o Taller da memoria que conta na actualidade con 120 inscritos das 7 parroquias. En Portonovo e en Noalla rexístrase o maior número de participantes con tres e dous grupos, respectivamente. Durante as clases, se practica a lectura, a escritura, a memoria e cálculo mental. Ademais, realízanse andainas, excursións culturais e actividades lúdicas para favorecer a socialización entre os participantes.
