Os efectivos de vixilancia estarán venres, sábado e domingo en horario ininterrompido, de 12 a 20 horas

Sanxenxo adianta, por primeira vez, ao primeiro fin de semana de xuño o seu servizo de socorrismo en Areas, Silgar, Canelas e Montalvo. Os efectivos de vixilancia estarán hoxe, mañá e pasado en horario ininterrompido de 12 a 20 horas. O mesmo servizo volverase repetir o vindeiro venres, sábado e domingo. Tamén se abrirán os baños destes areais.

O goberno decidiu este ano adiantar o socorrismo nas praias dentro da súa estratexia de mellora continua dos servizos e para dar resposta aos numerosos bañistas que gozan destes areais. A partir do 15 de xuño, os efectivos de salvamento estenderanse a un total de seis praias todos os días da semana. Así, a Areas, Silgar, Canelas e Montalvo sumaranse Foxos e O Espiñeiro-A Lanzada, tamén unha novidade deste ano, incluída como unha das melloras dentro do contrato do servizo adxudicado á empresa Salvar, formar e socorrer. Desde o 1 de xullo e até o 15 de setembro, o servizo estenderase ao resto de areais cunha ampliación horaria en Silgar. En total serán 80 persoas as que conformen o servizo de vixilancia.

Deste xeito, Sanxenxo anticipa a tempada estival dando resposta a unha demanda cada vez máis crecente de visitantes. As zonas de baño das 17 praias de bandeira azul xa se atopan desde fai máis dunha semana balizadas e as canles de nado entre Silgar e Baltar, e de Caneliñas xa están operativos. As pasarelas, as pérgolas de sombra, as casetas e torres de salvamento, así como os lavapés, que volven aos areais dous anos despois, xa están instalados. Nalgúns areais, como Silgar ou Canelas, os quioscos xa están en funcionamento. O Concello realizou un investimento de máis de 50.000 euros na posta a punto das praias.

A limpeza nos baños das praias volverá ser un verán máis cada hora e media, unha frecuencia que se impuxo co Covid e que o Concello decidiu manter como garantía sanitaria e de limpeza.