A actividade e o interese por asentarse no parque empresarial de Nantes segue crecendo. Desde o pasado mes de marzo, catro novas empresas solicitaron licenza para iniciar a súa actividade no polígono. Trátase dunha área de subministración de combustible e de lavado de coches, unha empresa dedicada ao aluminio, unha firma de servizos forestais sustentables e unha destinada á actividade agroindustrial. En total, ocuparán unha superficie de 64.333 metros cadrados

En total son xa 54 parcelas ocupadas con proxectos empresariais cun variado abanico de actividades económicas. O parque empresarial conta con 261 parcelas para actividade empresarial. A maiores, o Concello dispón dunhas parcelas que suman 48.704 m2 que se destinarán a equipamentos públicos, entre os que destacan as novas sedes da Policía Local, o Servizo de Emerxencias e os servizos de mantemento, parques e xardíns.

O parque empresarial reúne polo menos 6 actividades económicas distintas, pero os sectores que máis destacan por número e a superficie que ocupan son a alimentación e os materiais de construción, con seis e oito empresas en cada un destes segmentos.

En alimentación destacan Mercadona con case 10.000 m2 ocupados, séguenlle Eroski con 6.000 m2 e Xesnova global con 4.800 m2. No segmento dos materiais de construción hai empresas de carpintaría de madeira, carpintaría metálica, aluminios, granitos e louza sanitaria. Outro sector que destaca é o das enerxías renovables con Inelsa, unha empresa local con relacións comerciais e empresariais en máis de 35 países. Outras presentes son actividades de loxística, un gran bazar que ocupa catro parcelas cunha superficie de 6.000 m2, un tanatorio situado nunha parcela de 1.442 m2 e dúas gasolineiras, en parcelas de 1.200 metros cadrados e 2.067 m2, respectivamente.

O goberno está satisfeito co "bo ritmo" de actividade no parque empresarial, a pesar de dous anos cunha situación económica a nivel xeral marcada pola pandemia. "As nove baixadas históricas de paro consecutivas, a taxa de desemprego non 7% e os actuais 8.500 afiliados á Seguridade Social son síntomas de boa calidade económica. E nestas cifras, o parque empresarial tamén está sendo moi importante", asegura Telmo Martín, alcalde de Sanxenxo.