Sanxenxo pechou febreiro con 721 parados, 10 menos que en xaneiro. Pero o verdadeiramente relevante é que son 319 menos que o mesmo mes do ano pasado cando había 1.040 desempregados. E iso que a cifra de 2022 xa supuxo unha redución de 201 parados con respecto a febreiro de 2019 (1.241) ano de referencia polas súas mellores cifras.

Por primeira vez, en 2022, Sanxenxo reduciu a súa taxa de paro media anual por baixo do 10%, en concreto o 9,78%. Dato que xa foi mellorado nos dous primeiros meses de 2023, en xaneiro cunha taxa de paro do 9,37% e en febreiro do 9,24%. Porcentaxes que demostran que se está creando emprego a un ritmo que nin sequera contemplaban as previsións máis optimistas, especialmente, se temos en conta que nos dous primeiros meses do ano o paro alcanza as súas cifras máis altas e hai menos actividade turística.

A taxa de paro de Sanxenxo en xaneiro (9,37%) e en febreiro (9,24%) é a máis baixa de todos os concellos galegos de máis de 10.000 habitantes. Se o resto do ano se comporta como vén sendo habitual, é dicir, o paro seguirá baixando polo menos ata setembro, Sanxenxo podería pechar o ano cunha taxa de paro inferior ao 9%.

Examinados os datos cabe preguntarse que factores están a influír na creación de emprego. Por unha banda, o crecemento da actividade turística en tempada baixa, como avala o incremento de lixo, o consumo de auga e a ocupación do parking. E, doutra banda, está o desenvolvemento do parque empresarial.

Pero quizais a resposta haxa que buscala tamén nos datos da evolución catastral e, especialmente, no crecemento dos inmobles dedicados á actividade hostaleira, comercial e industrial. En 2017 Sanxenxo sumaba 1.288 inmobles dedicados a este tres actividades, actualmente ten 1.867, o que supón 579 establecementos máis e un incremento do 45%. Detrás de todos estes novos negocios está a creación de emprego que recollen os datos.