O alcalde, Telmo Martín, acudiu onte a Madrid onde recolleu as bandeiras das praias e do porto deportivo Juan Carlos I

Sanxenxo segue mellorando os seus estándares de calidade coa ampliación das súas Q de Calidade en catro novas praias e suma xa 16. O alcalde de Sanxenxo, Telmo Martín, recolleu onte en Madrid os distintivos, outorgados polo Instituto para a Calidade Turística Española ás Praias (ICTE), que avalan a calidade turística da Lapa, Areas, Areas Gordas, Baltar, Canelas, Caneliñas, Major, Montalvo, Panadeira, Silgar, Foxos e Pragueira ás que se incorporaron este ano Paxariñas, Area de Agra, Bascuas e O Espiñeiro, así como a do porto deportivo municipal, Juan Carlos I.

A XVI Edición da Entrega de Bandeiras "Q de Calidade Turística", "Safe Tourism Certified" e "S Sustentabilidade Turística" a praias e portos deportivos celebrouse na Secretaría de Estado de Turismo e contou coa presenza da secretaria de Estado de Turismo, Rosa Ana Trasfogueiro, e o presidente do ICTE, Miguel Mirones.

Trátase dun acto que anualmente convoca o ICTE co obxectivo de recoñecer a todos aqueles concellos que realizaron unha aposta decidida pola calidade, a sustentabilidade e a seguridade nas súas praias e portos deportivos. O obxectivo é subliñar a importancia da calidade certificada, segura e sustentable como ferramenta indispensable para afrontar os retos que o turismo ten por diante. "A aposta de Sanxenxo pola calidade segue aumentando e isto é un recoñecemento ao traballo ben feito e ao esforzo pola mellora continua", explicou o alcalde.