A actuación terá un custo total de 47.432 euros. A Xunta financiará o 70% e o 30% procederá de fondos municipais

O Concello de Sanxenxo cambiará o chan dos parques infantís de Panadeira (Sanxenxo), A Salgueira (Vilalonga) e A Carballeira (Noalla). A superficie atópase deteriorada nestes espazos lúdicos polo que se colocará unha base amortiguadora de caucho que se rematará con céspede artificial de última xeración en 925 metros cadrados. Ademais, co obxectivo de facer os espazos lúdicos máis inclusivos colocaranse cinco zonas de xogo nos parques de Canelas, San Roque, O Espiñeiro e Adina. Trátase de cinco randeeiras cesta pensadas para todas as idades e, especialmente deseñado, para nenos con deficiencias motrices, cumprindo os criterios de accesibilidade universal. A estrutura está formada por postes e traveseiro de aceiro galvanizado, con remaches laterais. Do traveseiro superior colga un randeeira cesta de poliamida onde caben varios nenos. O sistema de cadeas inclúe unha cadea de seguridade en ambos os laterais. O adxudicatario dos traballos é Multiservicios Doval, único licitador, que achega unha garantía total dos equipos e materiais fornecidos, #ante defecto de fabricación ou funcionamento, que inclúa a corrosión, fabricación, materiais e pezas defectuosas, durante un período de cinco anos. O prazo máximo para a entrega e colocación dos materiais será de 40 días naturais a contar desde a formalización do contrato. A actuación terá un custo total de 47.432 euros. Vicepresidencia e Consellería de Presidencia, Xustiza e Deportes financiará o 70% e o Concello o 30%.