Sanxenxo comezou esta mañá coa súa exaltación da cebola co showcooking do Obradoiro de Hostalería da Mancomunidade do Salnés e a actuación de Rodrigo Valente e os irmáns Visi na Praza de Pascual Veiga. Unha vez máis, profesores e alumnos do Obradoiro volveron demostrar o seu talento nos fogóns cun menú cuxo ingrediente principal era a cebola. Máis de medio centenar de comensais degustaron o quiche de cebola, a sopa de cebola, as canas recheas de compota de cebola e salsa de pementos, unha torta de queixo e un cóctel de autor tamén co ingrediente estrela, a cebola. A cata deu comezo ás 12 e ás 13 horas deron a substitución ao grupo formado por Rodrigo Valente e os irmáns Visi que fixeron bailar e cantar aos presentes cun repertorio musical moi coñecido. A homenaxe á Cebola continuará mañá cos Concertos da Cebola. Ás 21:30 horas, Dobre M, no Paseo de Silgar; ás 22:30 horas, Lorre, na Rosa dos Ventos, e ás 23:30 horas, Kaleikia, no Paseo do Barcos. Pola mañá a praia de Silgar acollerá os tradicionais xogos populares e ás 19 horas, terá lugar o concerto de Uxía Lambona e a Banda Molona. Para o domingo, ás 20:30 horas, está prevista unha actuación moi especial, a Banda Bailada, protagonizada pola Banda de Música de Sanxenxo e a Asociación Cultural de Abiñadoira, na Praza Pascual Veiga. Ás 22 horas, terá lugar a procesión nocturna para recoller a imaxe de Santa Rosalía e devolvela á igrexa San Ginés de Padriñán.