Portonovo renderá homenaxe ao mellores produto do mar a próxima fin de semana coa V Festa da Empanada Mariñeira que xa se fixo un oco entre as citas gastronómicas de referencia en Galicia. O Club de Piragüismo de Portonovo, coa colaboración do Concello de Sanxenxo e da Confraría de Pescadores de Portonovo, volve repetir unha fórmula que desde hai xa catro anos funciona e axúdalle a recadar fondos para continuar coas actividades ao longo da tempada levando ao municipio como bandeira.

O presidente do club deportivo, Alberto Rodríguez, xunto aos concelleiros de Deportes, Marcos Guisasola, e de Turismo, Juan Deza, e o patrón maior, Martín Domínguez, presentaron esta mañá a cita na sala de poxas da rula portonovesa. A lonxa abrirá as súas portas converténdose en escenario da V Festa da Empanada o sábado 23, ás 13 horas, cando está prevista a inauguración, e non será ata o domingo 24, ás 21:30 horas, cando se pechen as portas. Durante estas dúas xornadas poderanse degustar empanadas con ata 19 recheos diferentes como bonito, zamburiñas, mexillóns, peixe espada, pescada…. Todas as racións a prezos populares que van desde os 4 euros ata os 6 euros. “Este ano ampliamos a nosa fronteira con produtos pescados desde a costa de Viveiro ata A Guarda”, explicou. Non faltarán os showcookings nin tampouco a música ao longo destes dous días. O domingo, 24, haberá ás 17 horas un Obradoiro-Concurso familiar “Pequeempanada” con Rocío Garrido. Unha hora máis tarde, terá lugar o tradicional Concurso da Empanada Mariñeira no que se premiarán as tres mellores empanadas con estancias en hoteis, ceas e accesos a spa. A todos os participantes regalaráselles un vale para unha ración de empanada e unha bebida. As empanadas deberán ter como ingrediente principal un produto de Peixarías. A cita concluirá cunha Xuntanza dá Canción Mariñeira.

O concelleiro de Deportes, Marcos Guisasola, felicitou ao Club de Piragüismo pola iniciativa que “ano tras ano enche a lonxa coa degustación” e animou a participar a veciños e visitantes a que gocen da cita. Na mesma liña manifestouse o edil de Turismo, Juan Deza, que cualificou de “combinación perfecta” os mellores produtos do mar e o deporte. “Portonovo é mar e é tamén piragüismo polo que é unha festa para que gocen visitantes, pero tamén veciños”, dixo. O patrón maior, Martín Domínguez, mostrouse encantado de prestar as instalacións para a actividade. “Temos que axudar a un clube que fai as cousas ben e que propón unha festa na que se pon de protagonista aos nosos produtos”, sinalou.