O INE publicou hoxe os datos de pernoitas hoteleiras de agosto. Mes no que Sanxenxo volveu a liderar a ocupación hoteleira de Galicia con 234.938 pernoitas (3.877 menos que en agosto de 2022), o que supón o 14,4% do total de Galicia (1.631.894) e o 33,2% da provincia de Pontevedra (707.468). Sanxenxo superou ao resto das cidades galegas, Santiago de Compostela (212.045), A Coruña (121.675) e Vigo (118.798). Tamén a San Sebastián (220.001) pero nesta ocasión non a Bilbao, un destino gastronómico e cultural, que sumou 271.138 pernoitas. A falta dos datos de setembro que se coñecerán o mes que vén, Sanxenxo acumula en xuño, xullo e agosto 501.814 pernoitas hostaleiras o que supón a metade do case millón de pernoitas que suman os hoteis ao longo dos 12 meses do ano. Proximamente presentarase o “Informe Big Data” da Mancomunidade do Salnes referente ao mes de agosto que ofrece datos máis amplos sobre os turistas que pernoitan nos distintos aloxamentos vacacionais de Sanxenxo. Por tanto, non só dos hoteis, que é o caso dos datos que publicou o INE hoxe, senón tamén das vivendas de uso turístico e as segundas residencias que son as que dispoñen de máis prazas. A falta de coñecer eses resultados, desde xaneiro ata xullo Sanxenxo acumulaba 335.744 turistas ou viaxeiros, dos que 102.928, é dicir o 30,6% pernoitaron en hoteis, o resto fixérono noutro tipo de aloxamento.