O Concello de Sanxenxo conmemorará o 8-M cunha mesa redonda sobre "A igualdade no deporte" no Hotel Carlos I Silgar, ás 20:30 horas, no que se entregarán recoñecementos a 24 clubs deportivos locais polo impulso da figura feminina no deporte. Na mesa participarán Patricia Curbelo, xogadora de Viaxes InterRías de Fútbol Feminino; Carlos Castro Barreiro, adestrador do equipo feminino AX Saraiba do Mar; Iria Romero, árbitra de fútbol e representantes da Federación Galega de Fútbol. A xornalista e presentadora María Solar será a encargada de moderar o debate. A entrada é libre para todos os públicos.

Pola mañá, o Priorado de Arra acollerá un café coloquio interactivo, ás 11 horas, sobre a muller e abordarase a temática do libro da psicóloga sanitaria, Marta Martínez Novóa, “El síndrome de la chica buena”. Ademais, tamén se dará lectura ao manifesto de mulleres rurais do Concello de Sanxenxo. As persoas que queiran asistir deberán confirmar asistencia antes do 4 de marzo porque as prazas están limitadas ao correo Este enderezo de correo está a ser protexido dos robots de correo lixo. Precisa activar o JavaScript para velo. ou no teléfono 986 727 901.

A programación organizada polas concellarías de Servizos Sociais e Maiores e Educación, a través do CIM, inclúe ademais das actividades nos centros educativos que se están levando a cabo esta semana, a presentación do libro “Purificación Mayobre. Pensar o mundo en femenino", o próximo 16 de marzo, ás 17 horas no Club Náutico de Sanxenxo. A Casa Mariñeira de Portonovo acollerá o 22 de marzo, ás 20 horas, unha conferencia sobre a muller e a violencia na Ría de Pontevedra nos séculos XVIII e XIX que impartirá José María Leal Bóveda, profesor da UNED.

Ademais, os distintos departamentos municipais como o Centro de Día, a Ludoteca Municipal, o Taller de Memoria, as escolas infantís, as bibliotecas municipais. A Escola de Arte e a área de Educación de Adultos sumaranse coas súas actividades polo 8-M.