A proba celebrarase en xornada de mañá, de 10:00 a 14:00 horas, e de tarde de 16:30 a 20:30 horas.
Sanxenxo, 5 de novembro de 2025.- O pavillón de Baltar acollerá este sábado, 8 de novembro, o III Memorial Alexander Kachelaev de Loitas Olímpicas. O concelleiro de Deportes, Marcos Guisasola, presentou a proba esta semana xunto co presidente da Federación de Loita e Deportes Asociados, José Luis Olazabal, como colaborador da cita.
Esta competición terá lugar en xornada de mañá, de 10:00 a 14:00 horas, e de tarde, de 16:30 a 20:30 horas.
• Competición U17 de Loitas Olímpicas (en xornada de mañá)
• Competición U23 de Loitas Olímpicas (en xornada de tarde)
Este memorial pon en valor a figura de Alexander Kachelaev, que foi durante 30 anos técnico do CGTD de Pontevedra e seleccionador galego. O seu importante impulso ás loitas olímpicas en Galicia leva a organizar este memorial na súa vila adoptiva, Sanxenxo.
Está previsto que a esta competición se acheguen máis dun centenar de deportistas de toda España. O Colexio Galego de Árbitros estará presente para dirixir os enfrontamentos e dinamizar a competición. Todos os afeccionados poderán seguir a competición online a través da web: https://www.zenytsports.org/web/webnuevagal/index.php
Entre os asistentes, cómpre destacar a importante presenza de mulleres nesta competición, que xa forman parte do 35% das inscritas. Desde a Federación destacan importantes ausencias na competición. “Os deportistas do equipo ruso de loitas olímpicas, que tiñan previsto acudir a este evento, non poderán facelo por mor dos visados. Os problemas derivados da guerra en Ucraína empañan o deporte. Con estas ausencias, varios equipos internacionais cancelaron a súa participación”, apuntan.
Tras os éxitos organizativos de dúas Ranking Series Mundiais de Loita Praia en 2022 e en 2025, e do I Campionato Galego de Loita e SamboPraia, Sanxenxo está a postularse como un concello con grande atractivo para novas disciplinas deportivas polo seu contorno e instalacións deportivas.
