A actividade é gratuíta e ten unha duración de seis meses

Sanxenxo, 5 de novembro de 2025.- O curso de boxeo impulsado dende o CIM de Sanxenxo deu comezo onte con todas as prazas cubertas. A actividade é totalmente gratuíta, financiada polo Concello, e inclúe tamén o material necesario para a súa práctica. O obxectivo é o empoderamento e o fomento da autoestima en grupo, mentres se combina coa práctica dun deporte tan completo como o boxeo. Ten unha duración de seis meses e as clases impárteas Pibe’s Club Boxeo no pavillón municipal de Vilalonga, os martes e xoves de 20:15 a 21:30 horas.

Mediante exercicios grupais físicos, as participantes poderán traballar aspectos tan importantes como a adhesión a un grupo, habilidades sociais de cooperación e, sobre todo, fomentar a súa autoestima dun xeito saudable.

Este é o segundo ano que se leva a cabo esta iniciativa, dado o éxito de participación da primeira. Se algunha persoa está interesada pode contactar co CIM en Este enderezo de correo está a ser protexido dos robots de correo lixo. Precisa activar o JavaScript para velo. e anotarse na lista de agarda por se se produce algunha baixa durante o curso.

O boxeo supón un adestramento moi completo que axuda a aumentar a resistencia física e mellorar a capacidade aeróbica da persoa, e, á vez, produce grandes beneficios para a saúde mental, xa que é un bo catalizador de enerxía e emocións. Os seus movementos e golpes axudan a descargar a tensión acumulada, o estrés e a ansiedade. Ademais, practicar boxeo de maneira regular implica un aumento da autoestima, un incremento da produción de endorfinas e favorece a autodisciplina.