O contrato cunha duración de catro anos saíu a licitación por 7.936.809 euros
Sanxenxo, 11 de novembro de 2025.- Catro empresas optan á xestión do Servizo de Axuda no Fogar (SAF) en Sanxenxo que saíu a licitación por 7,9 millóns e unha duración de catro anos. Trátase de Attende Care S.L., Axuda Familia Castellón S.L., Idades S.L. e Son a túa Axuda S.L.
O Concello adianta a saída do servizo a concurso co obxectivo de deixar a lista de espera a cero. Con este novo concurso, pártese das 70.000 horas anuais ata un total de 84.000 horas. Cómpre lembrar que, en 2017, o gasto anual no SAF era de 331.525 euros o que supón un incremento do 639% co novo concurso que inclúe, ademais, a subida do prezo da hora ás traballadoras.
No contrato se contemplan dous tipos de servizos:
• SAF-Dependencia: cun horario de 7 a 22 horas, de luns a domingo. A intensidade horaria establécese en función da normativa vixente, do grao de dependencia das persoas ou da situación concreta das persoas segundo criterio técnico. Os servizos de sábados, domingos e festivos garantirán exclusivamente a cobertura das necesidades básicas da vida diaria.
• SAF-Básica (Libre Concurrencia): de luns a venres, excepto festivos, de 7 a 22 horas. A intensidade horaria establecerase en función da normativa vixente e da situación concreta das persoas segundo criterio técnico.
A empresa adxudicataria presentará un informe mensual sobre a execución do servizo, detallando datas de alta, baixas e suspensións, así como o número de horas e servizos realizados por cada persoa beneficiaria, distinguindo entre servizos comúns e extraordinarios. Tamén incluirá o nome do auxiliar asignado a cada beneficiario, especificando calquera cambio no persoal. Ademais, aportará un cadro mensual cos quendas e horarios dos auxiliares para garantir unha visión clara da organización do servizo. Así como tamén un informe de seguimento bimestral, como mínimo, de cada usuario do servizo, tendo en conta avaliacións, posibles incidencias e variacións. Finalmente, realizará unha memoria anual de desenvolvemento do servizo, que se presentará antes dos 15 días naturais seguintes ao inicio de cada exercicio.
