Sanxenxo, 11 de novembro de 2025.- A Policía Local de Sanxenxo adhírese á campaña da DGT especial de vixilancia e control do transporte escolar.

Ao longo de toda a semana vixiarán especialmente que estes vehículos circulen á velocidade permitida e que os seus condutores non fagan uso do teléfono móbil ou outros aparatos que supoñan distracción, xa que os sinistros máis habituais nos que se ven involucrados os autobuses escolares están causados principalmente por circular a unha velocidade inadecuada ou por distraccións. Tamén se realizarán controis de alcohol e outras drogas entre os condutores.

Ademais, debido á importancia que ten o cinto de seguridade en caso de accidente, prestarase especial atención ao uso destes naqueles autobuses escolares que os leven instalados. Por suposto, tamén se intensificarán as inspeccións sobre estes vehículos, comprobando que as autorizacións e documentos que deben ter son os correctos para a prestación do servizo. Verificarán tamén, que as condicións técnicas e os elementos de seguridade do vehículo sexan os que esixe a normativa, así como os requisitos especiais que debe cumprir o propio condutor, como son o permiso de condución ou os tempos de condución e descanso.

A Guía da Dirección Xeral de Tráfico “Ao cole sempre seguros” sinala que o 90% dos sinistros de tráfico con nenos que se producen en relación co transporte escolar ao colexio teñen lugar no momento de subir ou baixar do vehículo ou xusto nos instantes inmediatos e, en moitos casos, trátase de atropelos causados por unha distracción.