Unha xornada de educación afectivo-sexual para familias o próximo 27 de novembro ás 19 horas porá o colofón ao programa
Sanxenxo, 13 de novembro de 2025.- O Concello de Sanxenxo pon fin esta semana ao proxecto “Querérmonos ben. Unha acción educativa contra a violencia de xénero”, actividade subvencionada pola Deputación de Pontevedra no marco da convocatoria de subvencións dirixidas aos concellos de menos de 20.000 habitantes da provincia de Pontevedra para o fomento da igualdade de oportunidades e a prevención da violencia de xénero para 2025.
As sesións comezaron a principios do mes de outubro nos institutos de Sanxenxo e Vilalonga, así como nos colexios Abrente, O Telleiro, Portonovo, Nantes, Magaláns, Cruceiro e A Florida. En total participaron 340 alumnas e alumnos.
O obxectivo xeral deste programa é achegar unha educación afectivo-sexual desde unha perspectiva de xénero a toda a comunidade educativa, establecendo, ademais, estes obxectivos concretos:
• Fomentar a igualdade de trato e oportunidades entre mulleres e homes.
• Rexeitamento de todos os tipos de violencia de xénero.
• Replantexar e romper os estereotipos e roles de xénero tradicionais e machistas.
• Poñer en valor a masculinidade igualitaria e as diferentes formas do feminino.
• Rexeitamento da cosificación e hipersexualización dos corpos femininos.
• Desmitificar crenzas erróneas sobre o amor e a sexualidade.
• Identificar relacións baseadas na desigualdade e comportamentos abusivos e sumisos.
• Fomentar as relacións afectivas baseadas na igualdade, o consentimento e o respecto mutuos.
• Fomentar o respecto e o valor das diversidades de todo tipo.
• Fomentar a aceptación e o respecto aos corpos propios e alleos.
• Educar na prevención das enfermidades de transmisión sexual e embarazos non desexados.
• Aportar ferramentas de educación afectivo-sexual ás familias.
Entre as conclusións que se poden extraer xa co final da actividade, destaca a necesidade de seguir educando no consentimento e nas relacións saudables para previr e reducir as violencias machistas; insístese na idea de facer da educación en igualdade un tema transversal no desenvolvemento de calquera actividade educativa nos centros escolares e na necesidade de inculcar nas familias a participación nos procesos de ensino-aprendizaxe.
Tamén se insiste na necesidade dunha educación afectivo-sexual de base desde idades temperás, xa que, a pesar dos avances dos últimos anos, en moitas familias non hai unha conversa fluída e segue a ser un tema tabú a educación afectivo-sexual, manifestando a maioría dos adolescentes dúbidas sobre este tema.
Durante o desenvolvemento das sesións, fomentouse en todo caso a normalización das inquedanzas, dúbidas e intereses sobre relacións afectivas e sexuais, pero sobre todo, remarcase a importancia de que pregunten e expresen, con persoas adultas de confianza, todas esas cuestións para que estean acompañados na busca e filtrado da información.
Por todo o anterior, e como parte final desta formación, está prevista a realización dunha xornada de educación afectivo-sexual para familias que terá lugar o 27 de novembro na Casa da Cultura de Adina ás 19:00 horas.
A entrada é libre e gratuíta, e será impartida por unha educadora social e técnica en igualdade.
Para inscribirse e controlar o aforo, as persoas interesadas deben facelo no teléfono 986 727 901 (Servizos Sociais e CIM), escribindo un correo a Este enderezo de correo está a ser protexido dos robots de correo lixo. Precisa activar o JavaScript para velo., nas dependencias dos Servizos Sociais na rúa Rafael Picó, 4, ou no seguinte enlace:
https://docs.google.com/forms/d/e/1faipqlsdusmgammir0pkxbxzbd0ccmn9ebouiuw-g6jtdyt88nxfalw/viewform?usp=header
