O goberno aposta por potenciar as empresas municipais, Nauta e Ínsula, para diversos proxectos e investimentos

Sanxenxo, 13 de novembro de 2025.- Sanxenxo contará cun orzamento total para 2026 de 69,8 millóns. O goberno levará as contas para a súa aprobación ao Pleno ordinario do 24 de novembro tras pasar pola Comisión de Facenda o vindeiro día 18.

As liñas estratéxicas de actuación centraranse en investimentos no rural e en proxectos que se levarán a cabo desde as empresas municipais, Nauta e Ínsula, que permitirán ao goberno a realización de importantes actuacións claves no desenvolvemento do municipio. Desde Nauta, continuarase coa remodelación do porto de Sanxenxo e porase en marcha o aparcadoiro de San Roque en Portonovo, e desde Ínsula, impulsarase a promoción de vivenda pública co obxectivo de atender a demanda recollida no Rexistro Municipal de Vivenda.

A política social mantense como un dos piares das contas cun novo incremento de máis de 600.000 euros para 2026, ata acadar os 9,9 millóns de euros. Deste xeito, Sanxenxo alcanza os 225 euros por habitante e ano en gasto social.

Dos case 70 millóns de euros do orzamento, a entidade local contará con 23,9 millóns. As empresas públicas de titularidade municipal disporán para o próximo ano dos seguintes importes: Turismo de Sanxenxo, 1,8 millóns; Nauta, 26,8 millóns; e Ínsula, 7,2 millóns.