A previsión, se o tempo o permite, é iniciar os traballos de pavimentación a próxima semana

Sanxenxo, 17 de novembro de 2025.- Os traballos na rúa Cesteiros e Panadeira avanzan a bo ritmo, pese ás intensas choivas destas semanas. As obras céntranse na colocación da baldosa hidráulica en ambos os viais. A previsión é que a próxima semana se comece xa coa pavimentación das rúas da contorna do mercado que inclúen, ademais de Panadeira e Cesteiros, Viña da Fonte.

O proxecto de mellora destes viais, valorado en máis de 300.000 euros, inclúe a renovación do alumeado, a sinalización e a drenaxe existente. En canto aos semáforos no cruzamento da rúa do Progreso, prevese o seu traslado á nova ubicación dos pasos de peóns e a adaptación das súas ópticas. Ao longo de toda a actuación renóvanse completamente os pavimentos nas beirarrúas mediante a colocación de baldosa hidráulica sobre soleira de formigón.

Como complemento á reordenación do espazo urbano e á renovación de pavimentos, contémplase a colocación de mobiliario e xardinería. Prevese a colocación dunha varanda na rúa Progreso para impedir que os peóns crucen a calzada por zonas non habilitadas; e na rúa Viña da Fonte, na praciña, para protexer do desnivel entre a praza e a nova beirarrúa. Tamén está prevista a colocación de bancos, papeleiras e a creación de dúas novas zonas axardinadas.

Con estas melloras, búscase non só renovar as infraestruturas básicas, senón tamén facer máis agradable e accesible esta parte do municipio para veciños e visitantes.