Os edificios municipais iluminaranse todo o mes de cor morada polo Día Internacional da Eliminación da Violencia contra a Muller

Sanxenxo, 18 de novembro de 2025.- O Concello de Sanxenxo dará voz a catro mulleres do municipio que sofren maltrato no Día Internacional da Violencia contra a Muller. Será nun acto aberto ao público organizado pola Concellaría de Servizos Sociais, dirixida por Paz Lago, a través do CIM, que terá lugar o próximo 25 de novembro ás 19 horas no pavillón de Nantes. “Queremos seguir sensibilizando e visibilizando un problema que existe e ao que non podemos ser alleos nin inmunes”, asegura Lago.

Froito do convenio asinado entre o Concello e a Subdelegación do Goberno, inaugurarase un mural creado polo alumnado do Máster de Dirección de Arte Publicitaria da Universidade de Vigo baixo o lema “A violencia de xénero é universal e a resposta tamén o é”. Durante o mes de outubro, a artista local Ana Cancela dirixiu esta acción, coas ANPAS municipais e as Asociacións de Mulleres Rurais. A pintura mostra dun xeito simbólico a repulsa á violencia de xénero, mostrándose exposta neste pavillón por onde pasan distintos públicos ao longo do ano.

A continuación, a experta en igualdade e xénero, Sara Uris, será a encargada de conducir un relatorio que terá como fío condutor a análise da violencia de xénero, que se abordará dun xeito directo, entremezclado co testemuño real de vítimas de violencia de xénero de distintos perfís persoais do municipio. Trátase de mostrar que este tipo de violencia existe e segue existindo e, sobre todo, que pode suceder a calquera muller. Non existe un perfil de personalidade único para as mulleres que a sofren.

Por outra banda, os edificios e espazos públicos municipais iluminaranse todo o mes de cor morada polo Día Internacional da Eliminación da Violencia contra a Muller.