O centro educativo de Vilalonga contaba hoxe con 194 alumnos, 19 profesores e unha conserxe

Sanxenxo, 19 de novembro de 2025.- Tan só catro minutos foi o tempo suficiente para desaloxar do edificio do colexio Cruceiro a 194 alumnos, 19 profesores e unha conserxe nun simulacro de incendio realizado esta mañá. O aviso do suposto incendio ao 112 realizouse ás 10:05 horas e, a partir dese momento, comezou o protocolo de evacuación das distintas clases. En tres minutos xa estaban no patio e, en catro, contabilizados. Cada docente deixou na porta de cada clase unha papeleira para indicar que a aula estaba evacuada e pechada.

O servizo de Emerxencias Sanxenxo chegou aos 17 minutos do aviso, sufocou o suposto foco do incendio e realizou as comprobacións oportunas para restablecer a normalidade canto antes do centro. No dispositivo participou tamén Policía Local e persoal do centro. A concelleira de Educación, Nati Parada, tamén acudiu ao centro para comprobar o funcionamento do protocolo ante un caso de incendio.

Nas próximas semanas, o Concello continuará realizando simulacros no resto de centros educativos e tamén nas escolas infantís municipais. O obxectivo é preparar ás persoas para unha evacuación segura e ordenada en caso dun incendio real. Estes exercicios son cruciais para que os participantes coñezan os procedementos de emerxencia, minimicen o pánico e avalíen a eficacia dos plans de seguridade.