Creacións Luminosas comezou a colocación dos 345 motivos de Nadal polas distintas zonas do municipio

Sanxenxo, 19 de novembro de 2025.- Sanxenxo volve apostar polos Recunchos de Nadal tras a boa acollida do ano pasado. A Concellería de Cultura e Eventos, dirixida por Elena Torres, quere facer partícipes da decoración do Nadal aos colectivos do municipio. Baixo o lema “Unha asociación, unha árbore”, o Concello doará ás asociacións un total de 48 abetos para que os decoren eles mesmos en once localizacións diferentes.

“A idea é poder facer unha ruta polas distintas parroquias e que cada colectivo poida colaborar coa animación e decoración da súa parroquia”, asegura Torres. O Concello tamén colaborará con rosca e con chocolate con aqueles colectivos que realicen festa do acendido.

As once localizacións serán o Parque de O Espiñeiro, a Praza de Méndez Núñez, o Parque de Panadeira, A Bouza (Dorrón), a Carballeira (Noalla), a Capela de Aios, a Praza Pública (Vilalonga), a Capela de O Santo (Nantes), a igrexa de Adina e o Priorado de Arra. Cada “recuncho” elixirá o seu día de acendido.

Por outra banda, a empresa Creacións Luminosas comezou hai uns días a colocación dos 345 motivos de Nadal por 84 espazos diferentes das sete parroquias do municipio. O acendido realizarase o 5 de decembro na Praza dos Barcos e, a continuación, inaugurarase o Pazo de Nadal, unha gran carpa con mercadiño, actividades e pista de xeo que se instalará na Praza do Mar. O prazo de solicitude dunha caseta no mercadiño para a venda de produtos de proximidade finaliza o 23 de novembro.

Existen unhas bases ao dispor dos solicitantes na web municipal do Concello de Sanxenxo e nas súas redes sociais oficiais. A participación no mercado estará suxeita a criterios que se fixarán na diversidade de sectores, a calidade das propostas, a orixinalidade dos produtos e o equilibrio territorial, co obxectivo de ofrecer unha mostra representativa e plural do talento e da creatividade local. O prezo polo alugueiro de cada caseta é de 800 euros.