Con motivo da celebración de Santa Cecilia, patroa da música, realizan actuacións curtas cada tarde arredor das 19 horas.

Sanxenxo, 20 de novembro de 2025.- A Escola de Música de Sanxenxo leva, desde hai días, arredor das 19 horas, actuacións ao hall do Auditorio Emilia Pardo Bazán. Alumnado e docentes de distintas disciplinas realizan unha pequena pausa nas súas clases para tocar unha peza musical na entrada do edificio municipal. Pianos, saxos, clarinetes, metais, guitarras e contrabaixos son algúns dos instrumentos que xa se puideron escoitar.

A música continuará ata mañá con motivo da celebración de Santa Cecilia, patroa da Música. “É a nosa particular forma de facerlle unha homenaxe á nosa patroa”, asegura Benjamín Dorado. A idea gustou tanto a familias, alumnos e docentes que se seguirá utilizando como escenario este hall noutras ocasións. Sen renunciar ás audicións e actuacións doutro tipo.

A Escola de Música Municipal de Sanxenxo imparte ata 14 especialidades musicais (piano, óboe, frauta, fagot, clarinete, saxofón, trompa, trompeta, trombón, tuba/bombardino, guitarra, violoncello, contrabaixo e percusión), así como as materias de Iniciación Musical, Música e Movemento e Linguaxe Musical. Hai en total 221 alumnos e lista de espera nalgúns instrumentos en Música para Adultos como en Piano ou Guitarra.