A actuación centrouse nas canalizacións de augas pluviais e no ensanche dun tramo do vial.

Sanxenxo, 20 de novembro de 2025.- A primeira fase das obras de mellora da seguridade viaria na contorna do colexio A Florida, concretamente na Rúa Ricardo Santos, concluíu coas canalizacións e o ensanche dun tramo do vial. A actuación que está a ser executada por Oresa ten un custo de 54.593 euros e conta cunha axuda da Agader da Xunta de Galicia.

A actuación que enlaza coa estrada da Deputación está previsto que comece a súa segunda fase en xaneiro para completar a ampliación do vial en 107 metros pola marxe esquerda, así como a pavimentación dun sobreancho de 6,50 metros nun tramo de 27 metros grazas á cesión dunha parcela. Tamén se reporá un muro fronte ao pavillón, onde se habilitarán varias prazas de aparcamento.

A intervención finalizará coa pavimentación completa da calzada mediante unha capa de mestura bituminosa quente de cinco centímetros, o recrecido de tapas de rexistro e as instalacións de sinalización vertical.

A obra sumarase ao proxecto da senda peonil na estrada da Deputación, por Miraflores, co fin de reforzar a seguridade en todo o perímetro escolar e núcleo de poboación.

Mentres non conclúa a obra por completo, manterase o acceso alternativo ao centro educativo pola Rúa Miraflores como ata agora.