Sanxenxo, 26 de novembro de 2025.- O alcalde, Telmo Martín, presidiu esta semana a Mesa de Turismo, na que se realizou un balance da tempada e se repasaron os proxectos estratéxicos do municipio. No encontro estiveron presentes o concelleiro de Turismo e Praias, Juan Deza; Alfonso Martínez, presidente do CETS; Dulcinea Aguín, presidenta de Aviturga; Carmen Herrero, representante de Entretendas; Leonardo López, director do Hotel Carlos I Silgar; José Ameneiros, xerente do Hotel Mardevela; e Fabián Buezas, director comercial de InterRías. Deza debullou os datos rexistrados ata outubro: “Abril e xullo presentan subidas continuadas entre o 2,5% e o 10,8%, o que confirma a desestacionalización con máis chegada en primavera e comezos do verán”, apuntou. Tamén ofrece boas cifras o mes de outubro cun crecemento do 14,1%, “sinal claro de atracción fóra da tempada alta”.
En canto ás actividades, o Concello de Sanxenxo mantén a súa aposta pola asistencia a feiras e workshops, e volverá contar cun stand propio en Fitur, así como cos tótems na entrada do pavillón. “Este ano pedimos a S de sostibilidade para Silgar e a bandeira azul para a praia de Pampaído”, sinalou Deza. Ademais reforzaranse outros recursos turísticos, como un novo Sendeiro Azul desde o Con da Romaíña ata o Con da Ventureira, xunto con melloras continuas nas praias con accesos seguros e renovados.
Outro dos puntos tratados foi o traslado da sede administrativa de Turismo ao Pazo de Quintáns nas próximas semanas. O Concello analizará unha nova ubicación para o punto informativo de turismo en Sanxenxo nun lugar máis visible e atractivo.
Finalmente, o alcalde expuxo os proxectos estratéxicos para Sanxenxo que redundarán na actividade económica e turística do municipio, como as melloras no porto deportivo cun umbráculo de 2.000 m², un paseo costeiro que unirá Silgar con Rafael Picó coa renovación da pasarela de madeira de Baltar; o novo parking de Portonovo, a rehabilitación de A Telleira, a senda da Ría de Arousa, o Centro da Cultura Gastronómica no Pazo de Quintáns e o Centro de FP de Hostalaría en O Cruceiro.
