As entidades súmanse a esta proposta solidaria a favor do Banco de Alimentos Rías Baixas e de Cáritas

Sanxenxo, 27 de novembro de 2025.- A marea solidaria medra en Sanxenxo a través do programa “Un chocolatiño quente?”, posto en marcha o ano pasado por primeira vez a través da Concellería de Servizos Sociais e Maiores dirixida por Paz Lago. O obxectivo é recadar alimentos, doazóns e roupa para o Banco de Alimentos Rías Baixas e Cáritas, co fin de colaborar na cobertura das necesidades básicas das familias do municipio.

Agora, a través dos Recunchos de Nadal, baixo o lema “Unha asociación, unha árbore”, da Concellería de Cultura e Eventos de Elena Torres, as entidades do municipio colaborarán o día dos seus acendidos con esta recollida solidaria e, ao mesmo tempo, desfrutarán dun chocolate con rosca. Ademais, manteranse como puntos fixos o Bosque de Nadal de Noalla e a Aldea Navideña de Vilalonga. Pola súa banda, o día 21, Bordóns celebrará a súa Festa Solidaria e a Asociación de Veciños San Xoán faráo en Dorrón o día 27.

Os 48 abetos doados polo Concello ás entidades están a ser repartidos estes días polos traballadores municipais de xardíns nas localizacións previstas: Parque de O Espiñeiro (Portonovo), Praza de Méndez Núñez, Parque da Panadeira, A Bouza (Dorrón), a Carballeira (Noalla), a Capela de Aios, a Praza Pública (Vilalonga), a Capela do Santo (Nantes), a Igrexa de Adina e o Priorado de Arra. Cada “recuncho” elixe o seu día de acendido.

En Sanxenxo celebrarase este domingo 30, ás 18:00 h; en Vilalonga, o 5 de decembro ás 21:00 h; en Dorrón, o 6 de decembro ás 19:00 h; en Bordóns, o 7 de decembro ás 18:00 h; en Aios, o 7 de decembro ás 19:00 h; en Adina, o 7 de decembro ás 19:30 h; en Arra, o 7 de decembro ás 18:00 h; en Nantes, o 8 de decembro ás 18:30 h; en Noalla, o 8 de decembro ás 18:30 h; e en Portonovo, o 8 de decembro ás 17:00 h.