O Concello de Sanxenxo deu por finalizada a fase IV do proxecto de “mellora do punto limpo municipal” coa instalación de nova carteiría identificativa no exterior das instalacións. Os paneis inclúen información visible sobre o horario de apertura e un teléfono de contacto para atender consultas relacionadas co servizo, facilitando así o acceso á información e mellorando a experiencia das persoas usuarias.

Esta actuación súmase ás melloras realizadas en fases anteriores, entre elas a restauración completa da cuberta e a sinalización interna das zonas de recepción de residuos, avanzando no obxectivo de ofrecer un punto limpo máis ordenado, eficiente e accesible.

A fase IV está financiada a través dunha subvención pola que se establecen as bases reguladoras para a concesión de axudas a entidades locais de Galicia para o financiamento de actuacións en materia de recollida de residuos especiais de competencia municipal, cofinanciadas polo Fondo Europeo relativo ao Mecanismo de Recuperación e Resiliencia da UE, no marco do Plan de Recuperación, Transformación e Resiliencia, financiado pola Unión Europea – NextGenerationEU, convocadas en réxime de concorrencia competitiva para o ano 2022.

Con esta nova intervención, o Concello reforza o seu compromiso coa mellora da xestión de residuos e coa transición cara a un modelo máis sostible e respectuoso co medio ambiente.