A inauguración da carpa será o 5 de decembro ás 21 horas. A recadación irá destinada á loita contra a enfermidade rara de Xandre.
Sanxenxo, 28 de novembro de 2025.- Vilalonga presentou esta mañá na Praza Pública a programación da Aldea Navideña con nove días de actividades. A proposta organizada pola Asociación Cultural Os Cruceiros de Vilalonga, Mulleres Rurais A Candelaria, Comisión de Festas de Gondar e Vilalonga FC, realízase baixo unha carpa, financiada polo Concello, e abrirase o próximo 5 de decembro ás 21 horas. A recadación irá destinada integramente a Xandre, un neno veciño do Grove que padece unha enfermidade rara, unha doenza neurolóxica que afecta principalmente á substancia branca do cerebro e ao seu desenvolvemento psicomotor e cognitivo.
A cita arrancará o día 5 co pregón a cargo de Abelardo Martínez, o Poli Paco, e haberá chocolate quente e música en directo con Os Firrás. O sábado 6, ás 17:30 horas, haberá unha Pandeiretada coa Asociación Os Cruceiros de Vilalonga, Mulleres Rurais A Candelaria, Adro Vello do Grove, Pandeiretas Breogán, Cinco en Zocas e Os Gatiños de Portonovo.
O sábado 6, pola mañá e pola tarde, haberá un triangular de fútbol de cadetes e xuvenís. O domingo 7 de decembro, ás 11 horas, unha andaina con sorteos, mercado solidario, sesión vermú e música con Dani Kölmel. O venres 12, ás 16:30 horas, haberá un Encontro de Labores, e o domingo 14, ás 11:30 horas, a carreira de San Silvestre.
O sábado 20, Papá Noel visitará a Aldea Navideña ás 17 horas. Ese mesmo día celebrarase “Un Chocolatiño Quente?” en beneficio de Cáritas e o Banco de Alimentos Rías Baixas, aínda que a carpa será un punto fixo de recollida de alimentos. O día 27, celebraranse dous torneos de fútbol, de biberóns e veteranos. E o 2 e 3 de xaneiro, a partir das 16:30 horas, realizarase un obradoiro de galletas para os máis pequenos.
A carpa contará cun canón de calor para que as actividades se realicen nun ambiente agradable.
