Expropiaranse dúas parcelas para conseguir un itinerario continuo accesible en toda a súa lonxitude con beirarrúas e aparcadoiros

Sanxenxo, 28 de novembro de 2025.- A Xunta de Galicia resolverá a mellora da seguridade viaria no treito final da PO-504 que une Sanxenxo e Vilalonga. A actuación quedara pendente debido ao problema con dúas cesións, que agora se expropiarán para lograr un itinerario accesible en toda a súa lonxitude con beirarrúas e aparcadoiros.

O alcalde, Telmo Martín, e o concelleiro de Seguridade Cidadá e Emerxencias, Xoán Pérez, acudiron esta mañá a Dena, onde se anunciou a licitación do proxecto de “Mellora da drenaxe das estradas PO-550 e PO-504”, por valor de 503.102 euros, no que se inclúen estes traballos, acompañados polo alcalde de Meaño, Carlos Viéitez; o delegado territorial da Xunta, Agustín Reguera, e o xefe territorial da AXI, Manuel González Juanatey.

A estrada PO-504 ten unha lonxitude de 4,46 quilómetros e vertebra de norte a sur Sanxenxo. Rexistra un tráfico importante de 5.823 vehículos ao día e foi obxecto nos últimos anos de melloras relevantes por valor de máis dun millón de euros por parte da Xunta de Galicia. Entre elas, o acondicionamento de beirarrúas no que se investiron 223.502 euros, quedando pendente un treito final pola falta de disposición dos terreos ao non chegar a un acordo de cesión cos propietarios.

Tras a actuación, a beirarrúa neste treito final contará con 2,5 metros de ancho, e unha banda de aparcadoiro tamén de 2,5 metros. Para conseguir a plataforma para esta dotación, será necesaria a execución dun muro de 1,5 metros de altura máxima, que sosterá as terras.

Pola súa banda, o alcalde de Sanxenxo, Telmo Martín, amosou a súa satisfacción pola conclusión da obra que “permitirá a accesibilidade de todas as persoas con problemas de mobilidade”.