O programa de educación viaria, coordinado polo Poli Paco, chega ao IES Vilalonga para falar das "Emocións na educación viaria". A charla será mañá venres, ás 10:30h.
En esta ocasión a charla está dirixida ao alumnado dos ciclos Formativos e ten como finalidade a concienciación sobre a seguridade viaria, consumo de sustancias e comportamentos incívicos traballados dende as emocións. Trátase, en definitiva, de que os alumnos valoren a mobilidade segura que propicia a convivencia e a saúde e evita accidentes causados por imprudencias.
E é que, segundo a Dirección Xeral de Tráfico, o 64% dos mozos condutores teñen malos hábitos herdados da observación do comportamento dos pais ao volante.
“Por elo é imprescindible que os mozos e mozas coñezan as causas que poden provocar accidentes de tráfico e os riscos das malas costumes adquiridas como conductores ao mesmo tempo que valoren as posibles consecuencias” declarou Paz Lago, concelleira de Educación e Xuventude.
A charla correrá a cargo de persoas con perfís moi diferentes que ofrecerán diferentes visións baseadas nas súas experiencias persoais e profesionais.
- Santiago Salomón, bombeiro do Servizo Local de Emerxencias.
- Carlos Muñiz, presidente da Federación Galega de Ciclismo e presidente da Comisión de Seguridade Vial da Real Federación Española de Ciclismo
- Toño Bermúdez, piloto local de rally.
- Toño Otero, piloto local e presidente da Escudaría Congostra Team.
- Carlos Padín, mecánico de motos e dono do taller de motos Dezaracing.
- Alejandro Pereira, taxista con máis de 2 millóns de km.
- Montse Suarez e Pedro Hernández, veciños de Vigo e pais de Carliña, vítima dun sinistro na estrada
- Sandra Pérez, veciña de Sanxenxo, antiga estudante do IES Vilalonga e vítima dun sinistro viario