Boa parte dos trámites que calquera cidadán fai coa administración municipal estarán dispoñibles a golpe de rato a partir do próximo 17 de setembro.
Para isto durante a próxima semana os traballadores municipais terán sesións de formación para a aprendizaxe do funcionamento do programa da sede electrónica.
A implantación farase de forma progresiva e por iso, nun primeiro momento serán 4 as accións que os veciños poderán realizar a través dela:
-
Facer solicitudes de trámites.
-
Consultar o estado dos seus expedientes.
-
Recibir notificacións electrónicas.
-
Solicitar volante de padrón.
Ademais, a sede electrónica permitirá ao Concello publicar información de diferentes tipos, reducir a carga no rexistro e diminuír a cantidade de papel que se emprega a diario.
Cúmprese así coa obriga legal de notificar de forma telemática a tódalas persoas xurídicas e calquera notificación electrónica quedará relacionada co seu expediente automaticamente.
Dende a Concellería de Innovación destacouse que o obxectivo da implantación é dobre. “Por unha banda, facer máis eficaz a administración e por outro, dar máis facilidades aos cidadáns, que poderán realizar unha serie de trámites sen necesidade de desprazarse”.