A presentación do anteproxecto de mellora e humanización da zona portuaria de Portonovo é un compromiso incluído no pacto de goberno asinado polo PP e o SAL en xuño de 2017. En concreto, os dous partidos comprometémonos a presentar e acordar un anteproxecto antes de maio do 2019, que servise de base para a aprobación dun Plan Director e de Usos do porto de Portonovo.

O obxectivo principal do proxecto é dinamizar a actividade económica e turística da vila, desenvolvendo todo o potencial que Portonovo ten para convertelo nun lugar máis agradable para os seus veciños e máis atractivo para os visitantes os doce meses do ano.

O goberno presentou o proxecto á Conselleira de Mar e ao Presidente de Portos de Galicia, primeiro en Santiago de Compostela e, máis recentemente, o 27 de novembro, nunha visita da Conselleira á vila mariñeira.

Seguidamente presentámosllo á Confraría de Pescadores, reunión á que asistiron máis de 20 mariñeiros e a directiva do Club Náutico de Portonovo. Ao día seguinte aos medios de comunicación, en rolda de prensa e posteriormente fixemos cinco presentacións máis ás que convidamos a todas as asociacións da vila e a un gran número de hostaleiros e comerciantes, incluídos os que teñen establecementos na Rúa Rafael Picó, onde están previstos os cambios máis importantes.

Tamén llo presentamos ás directivas de Entretendas e o CETS, as dúas principais asociacións económicas do municipio. Ademais, o proxecto tivo unha gran repercusión nas redes sociais con máis de 15.000 visionados do vídeo, dos cales 10.000 producíronse nas 38 primeiras horas desde que se colgou. Un interese sen precedente ata a data, no Facebook do Concello e do Alcalde.

Se sumamos o alcance que tiveron todas as publicacións sobre o proxecto nas redes sociais que dependen do Concello e do goberno, superan as 40.000 persoas segundo os datos de Facebook. E sen contar outras redes sociais, que se fixeron eco do proxecto, pero non dependen do Concello e, por tanto, non dispoñemos dos seus datos.

En resumo, cremos que ao longo das tres últimas semanas a maior parte dos veciños, hostaleiros e comerciantes de Portonovo tiveron a oportunidade de coñecer a actuación que se propón. En calquera caso, se hai máis veciños de Portonovo, ou de calquera outro punto do Concello, que desexen coñecer con detalle o proxecto, só teñen que chamar ao Concello e solicitalo. O goberno está a disposición de quen o solicite.

A conclusión á que chegou o goberno é que o proxecto conta cun amplo respaldo. Como é lóxico fixéronse suxestións que se terán en conta de fronte ao proxecto definitivo e que teñen que ver con algúns cambios na zona do varadeiro, a localización da atracada dos barcos de Ons e Cíes e a inclusión no proxecto dunha fábrica de xeo de escamas, que agora non existe e hai que traelo desde Cambados.

O máis relevante é que a inmensa maioría coincide na necesidade de facer unha profunda renovación da zona portuaria que cumpra os seguintes requisitos: mellora do porto pesqueiro concentrando alí toda a actividade mariñeira, crear amplos espazos peonís e zonas verdes dos que agora carece Portonovo, prolongar o paseo marítimo e dotar a Portonovo do maior número posible de prazas de aparcadoiro.

O amplo respaldo que xerou o proxecto inclúe unha parte significativa de veciños que, aínda que lles gustan moito as actuacións que se propoñen, teñen dúbidas sobre a súa viabilidade polo seu alto custo económico, estimado en 20 millóns de euros.

As dúbidas que poida xerar a complexidade e o custo do proxecto non son un inconveniente máis ben o contrario. Se en 2001, antes de que o Concello comprase o porto deportivo e transformase todo ese espazo, preguntasemos aos veciños se Sanxenxo podía asumir un investimento de 15 millóns de euros e deseñar unha actuación como a que se fixo, ninguén llo creu. Con todo, fíxose en só 3 anos e ademais resultou ser moi rendible economicamente e, o que é máis importante, en termos sociais e de emprego.

No caso do proxecto de Portonovo hai que ter en conta que o parking subterráneo pode xerar máis dunha cuarta parte do custo total, tanto se se decide que o explote o Concello, coma se convocase un concurso para a súa concesión. Outro factor para ter en conta é que a parte máis cara do proxecto corresponde ao porto pesqueiro para o que o Concello espera contar cunha importante colaboración da Consellería de Mar e de Portos de Galicia.

En definitiva, o goberno está moi satisfeito coa acollida que tivo o proxecto de humanización da zona portuaria de Portonovo e en base a esa boa aceptación afrontamos o seguinte paso que é a redacción e posterior aprobación dun Plan Director de Usos do Porto en colaboración coa administración competente que é Portos de Galicia.