Un total de 7 empresas presentaron as súas ofertas para a construción do novo edificio cultural de Ou Revel.

Despois de moitos anos de espera, o pasado 23 de novembro o goberno licitaba as obras de construción deste edificio. Un edificio amplo, con dúas plantas que inclúe, entre outros equipamentos, un auditorio e que ten un orzamento total de 1.555.577€.

Agora, a mesa de contratación, seguirá os prazos de licitación, valorando as ofertas presentadas por Construcións Álvarez Prol, Civis Global, Copasa, Obras e Servizos Gómez Crespo, Construcións Ramírez, Copcisa e Prace Servizos e Obras.

O EDIFICIO

A construción deste edificio interrompeuse en 2008 cando estaba feita a cimentación e unha parte da estrutura, nas que se investiron preto de 200.000€.

A parcela na que está situado, en O Revel, ten unha extensión de máis de 2.500 m2 e conta cos servizos de rede de abastecemento de auga e saneamento, enerxía eléctrica e a zona dispón de beirarrúas e iluminación público.

Nestes momentos o goberno dispón dun proxecto, que xa se contou anteriormente, no que o novo edificio tería unha superficie de 1.500 m2, distribuídos en 2 plantas de 870 m2 e 633 m2.

A planta baixa, que é a máis ampla inclúe un hall, un auditorio e 3 vestiarios. Unha cafetería, aseos xerais, unha oficina de información, arquivo, gardarroupa e un local de limpeza.

A primeira planta, que terá o seu propio acceso independente a través do soportal, inclúe un hall distribuidor, unha ampla biblioteca, 3 aulas de formación, 3 despachos e uns aseos.

O proxecto inclúe a creación dun aparcadoiro dentro da parcela de 2.500 m2. O orzamento de execución das obras ascende a 1.555.577€ e ten un período de execución de 12 meses.