O Concello de Sanxenxo enviou á Deputación de Pontevedra o pasado 28 de decembro, o proxecto de construción do campo de fútbol de Dorrón, cun orzamento que ascende a 472.132€.

A mellora do campo de fútbol de Dorrón é un dos proxectos comprometidos no pacto de goberno asinado en xuño de 2017 polo Partido Popular e SAL. É o único campo de terra que queda en Sanxenxo, polo que unha vez se execute esta primeira fase, faise necesaria unha segunda actuación, coa instalación de céspede no terreo de xogo.

O proxecto presentado contempla principalmente a construción dunhas bancadas e da zona de vestiarios nova, así como o acondicionamento dunha zona reservada para a implantación de futuras instalacións como aseos públicos, despachos de billetes e un local multiusos-cafetería.

Actualmente o campo de fútbol ten unhas dimensións de 96 metros de longo por 58 metros de ancho. E desde a directiva do club negociouse a compra de dúas parcelas, de 95 m2 e de 45 m2, respectivamente, para poder ampliar o campo, de maneira que poida alcanzar os 100 m de longo e os 60 m de ancho.

As obras consistirán en:

- Demolición das estruturas e da cuberta existentes.
- Demolición das bancadas existentes.
- Escavación da zona de vestiarios nova.
- Realización de muros e zapatas das bancadas.
- Colocación da estrutura prefabricada de bancadas.
- Colocación da cuberta metálica.
- Realización dos servizos de abastecemento, saneamento, ACS e electricidade.
- Realización de peches e particións.
- Realización de acabados interiores.
- Realización de ramal de conexión de acceso coa entrada existente.