O Concello de Sanxenxo pon en marcha desde hoxe mesmo un servizo dirixido a axudar ás persoas de Sanxenxo que estean soas, teñan problemas de mobilidade ou sexan máis vulnerables ante o Covid 19. Así, aqueles veciños que se atopen nesta situación poderán chamar ao teléfono do servizo de Emerxencias de Sanxenxo, 986 72 00 00, durante as vinte e catro horas do día, para solicitar a entrega a domicilio da compra de alimentos ou medicamentos, así como calquera outra cuestión urxente que precisen.
O goberno local busca con esta medida que as persoas que non conten con axuda familiar para realizar este tipo de xestións poidan permanecer nas súas vivendas, evitando se é posible o contaxio. Así, os veciños que se atopen dentro desta situación poderán chamar ao servizo de Emerxencias Sanxenxo que enviará un efectivo á vivenda para recoller a lista e o diñeiro co que se efectuará a compra. Unha vez realizada, será trasladada á vivenda co consecuente ticket ou recibo da mesma, sen custo algún. O Concello colocou hoxe en supermercados, farmacias e centro de saúde, carteis para informar deste servizo extraordinario para que poida chegar ao maior número de persoas. Cabe tamén lembrar que o departamento de Servizos Sociais atende xa no municipio, en situación normal, a unhas 200 familias que precisan distintos tipos de axuda.
Doutra banda, o goberno local quere enviar unha mensaxe de tranquilidade aos veciños que se atopan pendentes de trámites administrativos. Tras a aprobación do Real Decreto 463/2020 que declarou o Estado de Alarma polo coronavirus, o Concello de Sanxenxo do mesmo xeito que o resto das administracións públicas, mantén en suspenso desde o pasado 14 de marzo todos os prazos. Unha medida que estará en vigor ata novo aviso.
Sen incidentes
O goberno local destaca o comportamento responsable e solidario tanto de veciños como de propietarios de establecementos comerciais e hostaleiros. Ata o momento, a Policía Local de Sanxenxo non tramitou ningún tipo de sanción por incumprimento das restricións de mobilidade no municipio nin tampouco rexistrou incidentes relevantes respecto diso.
